البداية

يا صباح اى حاجه حلوه طبعا اى حد هيقرا المدونه هيفتكرها من اسمها انها سياسية بس انا احب اضح وانوه واكرر واشجب واعمل حاجات كتير ان احنا ملناش اى دعوه بالسياسه ولا الكلام فيها ولا عنها وان الاتوبيسات فاضية وكل حاجه تمام وده ببساطه عشان انا عارفه نفسى كويس انا مش هستحمل الم واحد على قفايا من المخبر اللى هيسحلنى فى القسم او يمكن انى عندى حاجات اهم شغلانى واللى انا مخصوص عامله المدونه عشانها اصل انا بعيد عنكم وعن السامعين workaholic طبعا هتقولولى يعنى ايه لا ده مش مرض جلدى ولا حالة نفسيه تخليك كل شويه تبص وراك ده معناه مدمنه شغل اقولكم سيبكم من ده يعنى بالبلدى كده حماره شغل وبحب شغلى جدا طبعا هتقولولى انتى بقى بتشتغلى ايه انا بقى بشتغل مديرة مكتب بصوا من الاخر كده سكرتيره بس انا مش سكرتيره وبس او يمكن ده تبع السكرتارية وانا معرفش لا لا بلاش دماغكم تروح لبعيد والصراصير تبدا تنتشر فيها وتاخد دماغكم طريقين طريق رايح وطريق جاى انا سكرتيره محترمة بس من ضمن شغلى ان انا سكرتيرة الشركة كلها اولا ومديره مكتب لصاحبها واهم حاجه انى انى انى سويتش يعنى ارد على كل التليفونات واحولها وبردو ابعت فاكسات وايميلات واترجم ودى اكتر حاجة بكرها يمكن اكتر من ترتيب الورق بس رغم ده كله انا بلاقى نفسى فى الشغلزى الناس اللى بتلاقى نفسها كده فى المطبخ او اللى بتلاقى نفسها قدام المرايه او اللى بتلاقى نفسها فى خلفه العيال او واحده ممكن تلاقى نفسها فى حب واحد اه والله اعرف ناس كده والمصيبه انه واد معفن بس لما اشتغلت رغم انى مكنتش ناية اشتغل سكرتيرة قولت اهى اى حاجه هو حد لاقى شغل وبعدين قولت مكن بعدها اروح اى قسم تانى لكن تقول لمين .المهم يعنى انا عامله المدونه دى مخصوص عشان افضفض عن اللى بشوفه وعن اللى بيحصلى واللى نفسى انفذه بدل مااطق يعنى ابقى لا عملت ولا حتى اتكلمت بس فىالاخر اقولك ماتخدش فى بالك هى يعنى جت على دى ياعم دماغك دى بعد عنك هرتلت شغل